Guarda
Sün üna terrassa sulagliva drizzada oura vers süd in Engiadina Bassa as rechatta il bel cumün da Guarda sün ün'otezza da 1653 m s.m. Cuntschaint per seis magnific purtret da cumün e sias chasas engiadinaisas ornadas cun sgrafits ha Guarda surgni fingià l'on 1975 il premi da "Henri-Louis-Wakker". Guarda vain manzunà in inventaris da bains culturals d'importanza naziunala. La "Pro Guarda" pissera per il mantegnimaint d'ün cumün abel da viver e la protecziun d'ogets chi sun gnits creats sur tuot las generaziuns. Baincomal nun es quia be il cumün stess remarchabel, dimpersai eir mincha singula chasa: Portas pussantas ad arch, pitschnas fanestras, chi laschan entrar la clerità, balcuns torts, giatters da fier battü e decoraziuns originalas. Da istoric-culturala valur sun specialmaing da nomnar ils sgrafits. Suot las imposantas chasas d'abitar as rechatta eir quella chi ha inspira ad Alois Carigiet d'illustrar a seis "Uorsin". Quist grad da cugnuschentscha po eir portar privels cun sai. Il cumün po tendenzial dvantar üb objekt cun ots predschs d'immobiglias. Pervi da quai ha il cumün da Guarda sorti oura üna pitschna zona da fabrica dasper il vegl center da Guarda. Il terrain chi appartegna al cumün vain vendü favuraivel ad indigens e a persunas chi sun gnidas nanpro. Però na be our da quist motiv ha tut sü leger il nomer d'abitants ils ultims ons.
